ن سنين اتعودت اكل السلطة مع كوسة

من سنين اتعودت اكل السلطة مع كوسة، مش بس انا الكل هون بياكلها مع كوسة...... ومنها صارت تظهر علينا اعراض ملموسة، عسر في الهضم، تغير في ضربات القلب، هزل في جميع انحاء الجسم مع اضطراب في الحواس الخمس. ويمكن اخر هذه الاعراض اني صرت اشوف الصورة معكوسة، ما بعرف هي معكوسة ولا انا اللي بشوفها معكوسة........ و هاي شوي من الصور للغايب وللي حضر:
- انتخابات الفائز فيها خسران واللي ما حد صوت له مسك الصولجان!!
- دخل المجلس بمقعد وصار رئيس الحكومة، حكوا عنه اقتصادي كبير وديوننا صارت اكبر بكثير!!
- علشان تاخذ شهادة شرف لازم ما يكون عندك شرف، واذا بدك حسن سلوك لازم تكون بشي جرم ممسوك!!
- للبارات والخمارات في تصاريح واذ جيت ترخص لمسجد بتركب بساط الريح!!
- علشان تصير امام لازم تكون واحد بعمرة ما صلى ولا صام وما بتعرف تتوضأ ولا عمرك سمعت بالقيام!!
- خليك نايم ببيتك واخر الشهر بيجيك الأجر!!
- لازم تحمي محتلك اللي اغتصب ارضك وذلك!!
- لازم تعطي اجر للي استعبدك وموت اولادك جوع وموت امك قهر!!
- المجاهدين في السجون والعملاء بينحطوا في العيون!!
- رئيس مات مسموم واللي سممه الكرسي اله محسوم!!
- اجهزة امنية لحماية المستوطنين والحرامية !!
- رئيس بحصار شعبه مبسوط اللي بيعيش يعيش واللي بيموت يموت !!
- دولة مال الزمان ومالها ذلها برجالها اول اشي بتعلن استقلالها وبعدين بدها تشوف وين حالها!!
- حركة مقاومة رمت سلاحها و بتستجدي العدو بلكي يحن على حالها!!
- منظمة علشان يحكوا عنها موجودة تنازلت عن 78% من ارض الإسلام والعروبة!!
- اللي يقاوم خاين، والوطني هو اللي بحضن العدو نايم!!
- اللي ببيع شبر خاين واللي ببيع دونم عميل واللي بيبيع الوطن بيعملوله اكليل!!
- واخرها بعد التنازل الخطير بده على المنابر تكبير!!

صارت حالتي تزيد يوم عن يوم، حكيت ما بدهاش خليني اشوف طبيب عيون، طبيب العيون حكالي نظرك 6/6 يمكن لازم تشوف طبيب اعصاب (شو جاب لجاب) وشفنا طبيب اعصاب حكالي وضعك كويس بس يمكن حد عاملك حجاب. رحنا للشيخ بعد طول عناء فالشيوخ لدينا –كما تعلمون- مفقودون قال لي يا ابني لماذا تظن بنفسك الظنون مجنون من ارسلك الي وملعون. شو اعمل يا رب..... حكيت ما اللي الا اروح المستشفى واعمل فحص كامل، وهناك ما خليت طبيب الا زرته من طبيب العيون، لطبيب العقول، حتى طبيب الأسنان والطبيب اللي تخصصه نسوان (ما هي الدنيا معكوسة). طلعت سليم لكن بقيت حيران، طيب ليش انا بشوف الدنيا بالمقلوب؟ ليش الطب مرضي عنه محجوب؟
حكيت ما الي الا اروح انام بلكي اصحى من هالاحلام، وانا في الطريق شفت عمي درويش، بياكل زيت وزعتر وماسك بيده سيجارة حشيش، حكيت خليني انكش معه راس بلكي برتاح من هالاحساس. كلمة مني كلمة منه عرف انه في خبر جواي مكتوم وانه راسي مليان هموم. ما سألني شو فيك ولا من وينلك الهموم........ اعطاني الجواب وكأن مرضي اله معلوم وحكالي بيكفي تظلم العيون او أتفكر انك مجنون، سلطتك خليها مع الخيار واياك تاكلها مع كوسة وبعدها خبرني اذا الصورة صحت وآلا لسه معكوسة.